YU’I KORSOU ILSE MARREVEE TA PRESENTA “HISTORIA DI KORSOU”

WILLEMSTAD - Despues di tres aña ku e yu’i Kòrsou Ilse Marrevee a traha riba e buki “Curaçao Geschiedenissen”, porfin esaki ta kla i ku e por a entregué na su pueblo.

Ilse Marrevee, ta bini di mayornan hulandes, pero a nase na Kòrsou na aña 1962. Su tata tabata duna lès na St. Thomas College. Ku su dos aña, el a regresá Hulanda. Na Hulanda e ta skirbi pa korantnan i ta hasi programa pa radionan tambe.

Tres aña pasa, Ilse Marrevee a disidí regresá su isla natal. Den promé instante e no tabatin intenshon di skirbi buki, pero despues di tres siman e idea a bini serka dje pa tòg skirbi un buki di Kòrsou. Pero kon e buki mester a bini, i ken mester a bai den e buki, Ilse Marrevee no tabata sa.

Ilse Marrevee a disidí pa skohe hendenan ku tin un “background” basta amplio, i di diferente gremio di nos komunidat. E personanan ku el a skohe ta konta parti di historia di nan famia. Ku esaki Ilse Marrevee ta kere di por a kubri gran parti di historia di Kòrsou.

Esnan entrevista ta Rose Mary Allen, Gibi Bacilio, Ram Boolchand, Agustin Diaz, Valdemar Marcha, Michèle Russel-Capriles, Jaime Saleh i Wim Statius Muller.

Banda di historia di e personanan ariba menshoná, tambe por haña fragmento nan for di vários buki di e konosido eskritor lokal, Boeli van Leeuwen. Konsientemente Ilse a skohe e teksto nan for di buki di van Leeuwen, pasombra e tekstonan no ta bini serka e personanan ku el a entrevista manera pobresa, yu’i djafó, kon bida dje yu’i Kòrsou ta etcetera.

Ilse Marrevee a bini ku historia di Kòrsou, ya ku e ta di opinion ku bo mester sa bo orígen promé ku bo skirbi di futuro.

Den e buki tambe por haña hopi foto mira for di kolekshonnan priva, komo tambe otronan ku Ilse Marrevee a haña via instansianan.

For di mañan e buki ta optenibel na bukhandelnan, kaminda por hañ’é den dos vershon, esta na hulandes i ingles.

Naturalmente Ofisina di Turismo di Kòrsou (CTB) a yuda den realisashon di e buki históriko aki di Kòrsou.  

ilse marrevee willemstad

WILLEMSTAD - Ilse Marrevee ku su buki den man, instantenan promé ku e abordá un avion rumbo pa Ulanda.

 

« Terug naar Curaçao Geschiedenissen